Pomjenowanje dopomina na bywšu wobsedźerku ryćerkubła

Dźěwin (AK/SN). Hižo kónc meje su w Dźěwinje tamnišu nowowuhotowanu nawjes oficialnje poswjećili. Wot toho časa městnosć stajnje dale porjeńšuja. Na to skedźbnja Dźěwinska gmejna na swojej internetnej stronje. Nětko su tam přidatne móžnosće za sedźenje a wotpočink nastajili. Přidružili su so tři blida a šěsć małych stólcow.

Nawjes rěka nětko Naměsto Elisabeth von Zenker. Mjeno dopomina na bywšu wobydlerku Dźěwina a wobsedźerku tudyšeho ryćerkubła Elisabeth von Zenker (1871– 1957). Jeje swójbje słušachu wjacore ryćerkubła po wšej Sakskej. Naspomnjenja hódne su zasłužby Zenkerec swójby na polu mediciny. Tak je so Friedrich Albert von Zenker z jědnicu (Speiseröhre) zaběrał a ju přeslědźił. Rudolf Zenker pak je lěta 1958 prěni raz w Europje čłowječu wutrobu druhemu čłowjekej zasadźił. Město Mnichow je jemu za to čestne wobydlerstwo spožčiło.