Serbscy młodostni wubědźowachu so wo pokal PowerSerba

Kopšin (SN/hn). So po mokrym suwadle suwać, ćežki traktor ćahnyć abo walčk syna­ kuleć. Tole běchu jenož někotre discipliny sportoweho ewenta PowerSerba zašłu sobotu při Kopšinjanskim hrodźišću. Lětsa je Nukničanska, Prawočanska a Kopšinjanska (NuPraKo) młodźina z pomocu młodźinskeho towarstwa Pawk wubědźowanje organizowała. Posledni raz je so sportowe wubědźowanje w lěće 2021 w Radworju přewjedło. Dokelž so pak stajnje­ přemało mustwow přizjewi, su wubědźowanje w zašłych lětach stajnje wotprajili. Lětsa bě to hinak: cyłkownje šěsć mustwow wubědźowachu so ze zapalom wo pokal. Prowizoriske sportnišćo w Kopšinje běše zašły kónc tydźenja zdobom swjedźenišćo za lětuši wjesny swjedźeń wobydlerjow z NuPraKo. Hižo pjatk zahajichu tutón z filmowym wječorom. Wjesnjenjo wobhladachu sej zhromadnje film z wjerškami zašłych Jolka-swjedźenjow. Sobotu přizamknychu potom hižo naspomnjenje wubědźowanje PowerSerba. Město sportowych črijow pak trje­bachu wobdźělnicy gumijowe škórnje.