Radwor (MkWj/SN). We wobłuku swjatočnosće su minjeny pjatk w Radworju wjelelětneho dirigenta tamnišeho chóra Meja Achima Brankačka składnostnje jeho­ 100. posmjertnych narodnin počesćili. Nimale 50 zajimcow bě za to do Stareje cyrkwički přichwatało. Tam chowaja nasćěnowej kamjentnej plaće, na kotrymajž su mjena zasłužbnych Radworskich wótčincow minjenych lětstotkow zadypane. Wotnětka je tam tež Achim Brankačk zwěčnjeny. Mjez přitomnymi běchu nimo něhdyšich spěwarjow a zajimo­wanych Radworčanow tež syn počesćeneho, Stanisław­ Brankačk z mandźelskej, wnučk Měrko kaž tež bratr Jakub Brankačk. Radworski­ chór Meja, kotryž je lěta 2013 zemrěty Achim Brankačk na wšě 47 lět dirigował a wuměłsce nawjedował, wob­rubi ze swojim tuchwilnym dirigentom Pětrom Cyžom dostojnu swjatočnosć. Wosadny farar Beno Jakubaš kamjentnu taflu z nowym zapiskom žohnowaše. Iniciatiwu za zapisanje Achima Brankačka na lisćinje wótčincow nastorčił je Měrkowčan Marko Hančik na jednej z hłownych zhromadźiznow chóra. To předsyda Daniel Henich přitomnym přeradźi.