Thomas Klar jenički kandidat za wólby wjesnjanosty w Njebjelčicach

W Njebjelčanskej gmejnje wola njedźelu za tydźeń, 6. septembra, noweho wjesnjanostu. Jenički kandidat za tute zastojnstwo je Thomas Klar. Z nim je so Stefan Šmit rozmołwjał.

Knježe Klaro, Njebjelčanska gmejna je jako jedna z najrjeńšich po cyłej Němskej wuznamjenjena. Abo měło so mjeztym prajić, zo je jedna z najbóle rozpačenych gmejnow?

Nó haj ... (so zlochka posměwknje), cyle tak to njebych prajił. Wězo su ludźo rozdźělneho měnjenja a maja wšelake nahlady na wěste wěcy. A to je derje a dyrbi samo tak być. Z tym dyrbiš w gmejnje tež žiwy być. Wažne pak je po mojim měnjenju, nic wo tym sudźić, ale skerje sej měnjenje druheho naposkać a potom wotpowědnje reagować. To rěka rozdźělne měnjenja zjednoćić spytać.

Waš předchadnik André Bulank je so dla rozestajenjow a njepřećelskosćow jemu a jeho swójbje napřećo dočasnje ze zastojnstwa wuswobodźić dał. Njebojiće so, zo dyrbjeli snadź to samsne dožiwić a znjesć?