Pozdecy a Nuknica w swětoznatym simulatorje ratarstwa
Lejno (SN/jp). Serbscy online-ratarjo su so njedawno nad nowej kartu w ratarskim simulatoru 25 wjeselili. 155 móžnym hrajnym kartam, na kotrychž móžeš w kompjuterowej hrě žito a zwěrjata plahować, je so wóndano tež wokolina Lejna přidružiła.
Přewažnje wothrawa so digitalne žiwjenje w Pozdecach. Tam startuje hrajer ze swójskej LPG, kotraž je w stilu časa NDR natwarjena. Na spočatku ma swójski skład za zorno, kaž tež kopicu móžnosćow za parkowanje swojich mašinow. Napřećo burskemu statokej je wikowanišćo, hdźež móže hrajer mašiny a připowěšaki kupić. Čim dlěje hru hraje, ćim wjac pjenjez nadźěła a z tym tež nowe a wjetše mašiny kupuje. A tam započinaja so problemy: Ležownosć je tak mała, zo móžeš ze syčomłóćawu lědma ranžěrować. To je wobćežne, hdyž dźěłaš pod časowym ćišćom.
