Wojerecy (KD/SN). Dźěła na Wojerowskim dwórnišću so dlija. 2024 běchu Němska železnica a jeje partnerojo započeli nastupnišća kaž tež dwórnišćo same tak ponowjeć, zo budźe bjez barjerow. Dohromady něhdźe 21 milionow eurow inwestujetej Němska železnica a wobchadny zwjazk wuchodna Sakska do noweho tunla za pasažěrow wot předměsta dwórnišća na nastupnišća 1/2 a 3/4. Dale za­twarja tři nowe lifty a digitalne informaciske systemy. We wobłuku dwórnišća tež kolije ponowja. Tole wšo nawoda managementa dwórnišćow wobłuka Drježdźany Heiko Klaffenbach wóndano na zjawnym terminje we Wojerecach rozkładowaše.

Zo so dźěła nětko dlija, zaleži na tym, zo je po cyłej Němskej přemało ekspertow, kotřiž bychu wosebitu techniku železnicy tak instalować móhli, zo hodźi so wužiwać. Tole dyrbja wyši měšćanosta Torsten Ruban-Zeh a wobydlerjo města akceptować. 2027 pak ma naprawa zakónčena być. Jako započatk je železnica nětko prěnju informacisku taflu nastajiła, kotraž pasažěrow serbsce a němsce wo tym informuje, hdźe što namakaja.