Gmejnska rada Pančicy-Kukow wuradźowała

Pančicy-Kukow (SN/MG). Gmejna Pančicy-Kukow chce w Swinjarni wjesny puć ponowić. Na posedźenju gmejnskeje rady wčera, štwórtk, předstaji planowanski běrow Linke radźićelce a radźićelam wotpowědne plany. Započeć chcedźa klětu. Jako prěni chcedźa nahły kónc dróhi wot młyna hač dosrjedź wsy ponowić. Tam bě wulka woda něhdy wšón plester wotpławiła. Zo bychu wodu w přichodźe lěpje ze wsy dóstali, chcedźa specielny kanal za dešćowu wodu zatwarić. Plesternaki nimo toho do betona kładu, zo njeby je dešć zaso­ wotpławił. Dalši twarski wotrězk je nawjes. Tam chcedźa puć asfaltěrować. Naposledk ponowja wotrězk wot młyna hač na hižo asfaltěrowany kónc dróhi. Prěni wotrězk započnu klětu po jutrach twarić, dalšej wotrězkaj potom w slědowacymaj lětomaj. Twarske dźěła financuje gmejna ze spěchowanskich srědkow, kotrež lětnje za wobhospodarjenje dróhow dóstawa. Tute su zašłe lěta hižo za projekt nalutowali, tak zo měli dosahać.