Staroměšćanski festiwal ludźi z mnohimi poskitkami zabawjał

Budyšin (CS/SN). Dwě lěće dołho bě Vivien­ I. Budyska kralowna žonopa. Nětko je jeje čas w zastojnstwje nimo. Na wosmym staroměšćanskim festiwalu w Budyšinje su organizatorojo Vivien sobotu popołdnju na Hłownym torhošću z jeje zastojnstwa wuwjazali a nowu kralownu intronizowali. Rozžohnowała je so prěnja kralowna žonopa chětro emocionalnje. Vivien Lenz něšto horcych sylzow wupłaka, jako jej krónu z hłowy wzachu. Swój čas jako kralowna žonopa je Vivien I. z mnohimi terminami napjelniła. Hdys a hdys bě samo serbowała. Jako posledni wjetši termin wopyta wona wóndano zhromadnje z druhimi majestosćemi sakskeho ministerskeho prezidenta Michaela Kretschmera (CDU). Vivien I. dźakowaše so wšitkim, kotřiž běchu ju w minjenymaj lětomaj podpěrali, wosebje pak swójbnym. Jeje maćeri přepoda tohodla šerpu z nadpismom „Queen Mum“.