„Serbšćina mój wid na Łužicu rozšěrja a wobohaća“, praji Steffi Jähne. 35lětna socialna dźěłaćerka je w Zhorjelcu wotrostła a lubosće dla do Budyšina ćahnyła. Tam wuknjetej jeju dźěsći serbsce. Jeje prěnje zetkanje ze słowom „witaj“ wuskutkowa zadźiwanje, ale tež začuće witanja.­ „Stefka“ bě hižo na Floriana Kaulfürstowych tydźenskich rozmołwnych kołach za staršich serbsce wuknyła. Rěč wotewri jej cyle nowu perspektiwu. Dźakownje je tuž móžnosć přiwzała, w lětušim Domoj-kursu swoje rěčne kmanosće rozšěrjeć.

Zo su na wučbnych dnjach tež jeje hobbyje rólu hrali, bě za Steffi wulkotnje. Syman Hejduška, čłon skupiny Popsorben, předstaji mnohostronsku serbsku hudźbu. To so jej jara lubješe, wšako bě do­ toho hižo rady spěwy Kolektiwa Klanki słuchała. Steffi rady pućuje a wari. Tuž so wjeseleše, ze Stanijom Brězanom jara zajimawe Kopšinjanske hrodźišćo wuslědźić a pola Raphaele Wićazoweje w Radworskim Dwórnišću inkluzije serbsku kuchnju lěpje zeznać směć. Nimo­ toho wona rady rejuje a je Soni Hrjehorjowej za dohlad do serbskich rejow­ jara dźakowna.