Běła Woda (AK/SN). Wot lěta 1953 wobstawaca stacija młodych přirodowědnikow a technikarjow w Běłej Wodźe hotuje so na wužadanja přichoda. Hač do kónca 2028 nastawa jako projekt strukturneje změny stacija přichoda za techniku, přirodowědy a wuměłstwo. Dotalny domicil na juhu Běłeje Wody změni so na twarnišćo. Za přichodnej lěće a jako nachwilne rozrisanje přećehnje stacija do bywšeho twarjenja sćelaka Radio WSW. „Tam móžemy wobsahowe dźěło dale wjesć, tak zo ničo njewusnje“, tak nawoda stacije Bernd Frömmelt. Někotre ze swojich poskitkow přewjedu tež na dalšich městnach, mjez druhim w saněrowanym dwórnišću abo w sociokulturnym centrumje Telux. Nachwilny domicil słuša Běłowodźanskim měšćanskim zawodam, kiž jón za tón čas přewostaji.

Nowa stacija přichoda płaći 4,88 milionow eurow. Najwjetši dźěl toho zapłaći Zwjazk. Dale wobdźělitej so Sakska a město. Dźesać procentow přewozmje stacija sama, štož chce z darow a kreditow financować. Klětu w nalěću chcedźa twarić započeć. Kónc lěta 2028 – k 75. narodninam stacije – ma so nowa, moderna stacija přichoda přepodać.