Muzeje wabja wopytowarjow ze zabawu a putacymi temami

Wojerecy/Kamjenc/Budyšin (SN/MiR). Wjedrarjo wěsća přichodne dny niske temperatury a dešć, to je prawe wjedro za wopyt muzeja. We Wojerowskim hrodźe njeposrědkuja sobudźěłaćerjo wopytowarjam jenož wědu, ale skića jim tež tójšto zabawy. Jutře a zajutřišim přeprošuja wosebje dyrdomdejnikow wot 7 do 14 lět na zarjadowanje „W swětle sćina“. W ćěmnym hrodźe móža wot 18 hodź. za schowanymi pokazkami na čłowjekow a zwěrjata pytać. Hač dźěći wotmołwu na prašenje, što so w swětle jewi a što so póćmje chowa, namakaja? Při eksperimentowanju a při paslenju trjebaja wšitke zmysły. Nimo toho wočakuja je mnohe hódančka a wobkedźbowanja.

Zběranje steji jutře w Kamjenskim Muzeju zapadneje Łužicy w srjedźišću. We wotrjedźe Sammelsurium składuja tysacy črjopow starych sudobjow, fosilije, mineralije, zwěrjeće preparaty a skelety. Štwórtk pak so kreatiwne hłójčki w Elementariju muzeja zetkaja. Pisanosć nazymy je mnohim z wulkotnej inspiraciju. Z paslenkami abo mólbami, kiž tam nastanu, móža swoje doma rjenje wupyšić.