Ćisk (JT/SN). Na nazymskim koncerće minjenu njedźelu w Ćisku je Chór Židźino pod nawodom Pětra Cyža něhdźe 140 hosći z wotměnjawym programom zawjeselił. Kak wulki zajim bě, pokaza so hižo do zahajenja koncerta. Županka Wojerowskeje župy „Handrij Zejler“ Gabriela Linakowa a regionalna rěčnica Juliette Aulichowa běštej z dalšimi pomocnikami na kofej a tykanc přeprosyłoj. Poł hodźiny do koncerta běchu městna na žurli tak požadane, zo bě za pozdźišo přichadźacych wopytowarjow ćežko, hišće swobodny stólc namakać.

Nimo mnohich hosći z Wojerec a wokoliny witachu tež skupinu z Münstera. Čłonojo hólčeho a tachantskeho chóra při tachantskej cyrkwi w Münsteru a jich swójbni přebywaja tuchwilu w Budyšinje, domiznje redaktorki časopisa Pomhaj Bóh Katje Meyeroweje. Pytajo za zaběru­ storčichu na njedźelu popołdnju připowědźeny nazymski koncert a so spontanje rozsudźichu sej do Ćiska dojěć.