Měšćanska rada wo nakupowanišću kontrowersnje diskutowała
Wojerecy (AK/SN). W sewjernym dźělu Wojerec ma bórze nowe nakupowanišćo nastać. Twarski plan za „Nowu Kinajchtsku holu“ wopřijima dźesać hektarow wulku płoninu. Nimo bydlenskich domow maja tam kupnicy Edeka a Aldi, drogerija a fachowy wobchod za zwěrjata nastać. Po kontrowersnej diskusiji je měšćanska rada wutoru wotpokazała, wo tym wobydlerski rozsud přewjesć. Tole bě frakcija Aktiwne Wojerecy/Zeleni namjetowała. Zdobom su radźićeljo twarski plan schwalili. Runočasnje chcedźa we Wojerecach nakupowanišćo Treff 8 zachować. Za to wobzamknychu tak mjenowany zakaz změny. To woznamjenja, zo so we wobstejacym nakupowanišću ničo změnić nima, dołhož tam twarski plan płaći.
