Delanscy radźićeljo dalše nadawki za nowy hort w Ralbicach přepodali

Róžant (JK/SN). Nowotwar horta w Ralbicach běži po planje a dalše dźěła hišće čakaja. Za to je gmejnska rada Ralbic-Róžanta na swojim zašłym posedźenju nimale jednohłósnje dalše nadawki přepodała. Při tym běštaj tež zastupjerjej planowanskeho běrowa přitomnaj. Wonaj firmam, kotrež nadawki přijimachu, swěrne dźěło wobkrućichu. Radźićelow zadźiwa, zo je nadawk za kładźenje kachlicow firma z Bayerskeje dóstała. Tuta bě so hižo na wupisanju za nowotwar pěstowarnje wo nadawk požadała, ale jenož druhi najlěpši poskitk wotedała. Nětko smě za 26 360 eurow w nowym horće kachlicy kłasć. Blidarske dźěła a nutřkowne durje budźe firma z bliskosće, mjenujcy ze Zhorjelca za 18 472 eurow wukonjeć. Tohorunja zatwari špundowanje za 26 300 eurow firma ze Zhorjelskeho wokrjesa.