Tysacy su romantiski kaž tež serbski wječor w Budyšinje dožiwili

Budyšin (SN/MiR). Bajkojće nakupować – to bě hesło lětušeje Romantici, zašłu sobotu w Budyšinje. Mjez wustajenišćemi tež serbske wusahowachu.

Na žurli Serbskeho ludoweho ansambla zhromadźi so na wšěch 80 zajimcow za Caraga. Fantasy-roman knihu „Woodwalker. Carag so přeměnja!“, prěni z rjada knihow z pjera Katje Brandis, je nětko Lipšćanske nakładnistwo Veles pod nawodom Lubiny Hajduk-Veljkovićoweje w serbskej rěči wudało. Wo přełožk do hornjoserbšćiny je so Měrana Cušcyna starała. Wot serbskeho dźiwadźelnika Clemensa Bobki słyšachu wopytowarjo, kak so puma Carag na hólčeca přeměni a na Highschool dalšich přeměnjakow (Gestaltwandler) zeznaje. Ze swojim hłubokim měrnym hłosom zapřahny wón wopytowarjow do cuzeho swěta. Hudźbny přewod Tabeje Welsec duchowne pućowanje wožiwi.