Krótkopowěsće (24.07.19)

srjeda, 24. julija 2019
artikl hódnoćić
(0 )

Twarske dźěła so dlija

Pančicy-Kukow. Hinak hač spočatnje planowane njebudźe pjekarnja w klóštrje Marijinej hwězdźe w Pančicach-Kukowje hač do kónca awgusta hotowa. Kaž zdźěli dźěłarnja za zbrašenych, ke kotrejž pjekarnja słuša, so twarske dźěła dlija. Tuchwilu njemóža hišće rjec, kak dołho dźěła w pjekarni hišće traja. To samsne přitrjechi za kofejownju a přechod do klóšterskeje zahrody.

We warjenskej bitwje

Mainz. We warjenskej show ZDF „Die Küchenschlacht“ je tón tydźeń Lubina Ješkec mjez mjezy-finalistami. Póndźelu přeswědči wona ze serbskej kwasnej poliwku a twarohowymi kulkami, wčera z apri­kozowym tykancom a waflu. Najpozdźišo pjatk budźe jasne, hač zaćehnje z Chelna pochadźaca Serbowka a w Mnichowje skutkowaca kosmetikarka do finala najlěpšich šěsć hobbyjowych kucharjow.

Skóržba wotpokazana

Karlsruhe. Zwjazkowe wustawowe sudnistwo je dźensa skóržbu sakskeje AfD wotpokazało. Kaž sudnistwo zdźěli, njeje strona zakonske předpisy za skóržbu spjelniła. AfD bě njepřizwolenja kandidatow za wólby Sakskeho krajneho sejma dla skóržbje w Karlsruhe kaž tež Sakskemu wustawowemu sudnistwu zapodała. Na rozsud z Lipska hišće čakaja.

FCB přećiwo AC Mailand dobył

Kansas City. Rekordny němski koparski mišter FC Bayern Mnichow je swoju wabjensku turu w USA z dobyćom 1:0 přećiwo AC Mailand zakónčił. Leon Goretzka trjechi w přidatnym hrajnym času prěnjeho połčasa po přihrawce Joshuwy Kimmicha. Trenar Nico Kovać šonowaše po intensiwnych treningowych a pućowanskich dnjach Roberta Lewandowskeho, Sergea Gnabryja a Javija Martineza.

Zverev w Hamburgu koło dale

Hamburg. Tučasnje najlěpši tenisowy profi Němskeje Alexander Zverev je při turněrje w Hamburgu wosmifinale docpěł. 22lětny rozsudźi při temperaturach wokoło 30 stopnjow duel přećiwo Nicolasej Jarry z Chile ze 6:4 a 6:2 za sebje. Do turněra bě Zverev tak mjenowanu wildcard dóstał a po třoch lětach zaso raz w swojej domiznje nastupił.

wozjewjene w: Krótkopowěsće
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND