Krótkopowěsće (15.09.20)

wutora, 15. septembera 2020
artikl hódnoćić
(0 )

Schadźowanka budźe!

Budyšin. Organizaciski team załožby je rozsudźił lětušu schadźowanku w Budyšinje přewjesć, a to 21. nowembra w „Krónje“. Přihoty su zaběželi, a kul­turne skupiny budu najručišo informowane. Wobšěrny hygienowy koncept, kotryž je z wuměnjenjom, nětko zdźěłuja. Reje pak žane njebudu a bara wostanje za­wrjena.

Dalše štyri koronapady

Budyšin. Přez kónc tydźenja su w Budyskim wokrjesu dalše štyri nowoinfekcije z koronawirusom zwěsćili. Jedyn pacient je so zwonka wokrjesa natyknył, tamni na swójbnych swjedźenjach. Ličba w zwisku z koronu zemrětych wučinja mjeztym 21. Spočatk meje natyknjena 53lětna žona, kotraž bě wot toho časa w chorowni, je komplikacijow korona­infekcije dla zemrěła.

Štó dóstanje myto publikuma?

Drježdźany. Hač do 21. septembra ­móža zajimcy wo lětušim publikumowym myće Sakskeho fondsa „Čiń sobu!“ pod www.mitmachfonds-sachsen.de/publikumspreis2020 wothłosować. Stajnje dźesać projektow je za srjedźoněmski a łužiski rewěr w poskitku. We łužiskim je tež tón Budyskeje hwězdarnje pódla. Serbski projekt nominowany njeje. Dobyćerja spěchuja z 15 000 eurami.

Dynamo koło dale

Drježdźany. Třeći zwjazkowy koparski ligist Dynamo Drježdźany je w prěnim kole DFB-pokala přećiwo druhemu ligistej HSV Hamburg ze 4:1 jasnje dobył. Tež zwjazkowy koparski ligist Borussia Dortmund zmištrowa prěni zadźěwk přećiwo MSV Duisburgej a doby 5:0. Postupnik do zwjazkoweje ligi Arminia Bielefeld zwrěšći pola regionalneho ligista Čerwjeno-běli Essen z 0:1.

Zverev w finalu podležał

New York. Němski hrajer tenisa Alexander Zverev je prěni grandslam-finale swojeje karjery snadnje přěhrał. 23lětny z Hamburga podleža w kónčnej hrě turněra US-open Awstričanej Dominicej Thiemej w pjeć sadźbach, po tym zo běše hižo 2:0 nawjedował. Po wjac hač štyrjoch hodźinach přetwori tučasnje třeći najlěpši swěta swój hrajny bul.

wozjewjene w: Krótkopowěsće
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND