Z nowej županku
Slepo. Diana Maticowa je nowa županka Domowinskeje župy „Jakub Lorenc-Zalěski“ z.t. a tak naslědnica Manfreda Hermaša, kotryž na hłownej wólbnej zhromadźiznje minjenu wutoru w Slepjanskim Serbskim kulturnym centrumje znowa njekandidowaše. Za městožupanku su delegaća Stephanie Bierholdtec wuzwolili.
Wotewru wobnowjenu synagogu
Zhorjelc. Po něhdźe tři lětdźesatki trajacym saněrowanju chcedźa póndźelu Zhorjelsku synagogu jako „Kulturny forum Zhorjelska synagoga“ znowa wotewrić. Hosćo swjatočneho akta budu mjez druhim społnomócnjena zwjazkoweho knježerstwa za kulturu a medije Monika Grütters (CDU), sakski ministerski prezident Michael Kretschmer (CDU) a předsyda Drježdźanskeje židowskeje wosady Michael Hurshell.
Incidenca nimale na nuli
Budyšin/Zhorjelc. Hač do wčerawšeho su w Budyskim wokrjesu tři nowe natyknjenja z koronawirusom zwěsćili. Incidenca po Roberta Kochowym instituće je tu dale 2,0. W Zhorjelskim wokrjesu njejsu dalšu infekciju registrowali. Incidenca tam je po wobličenju RKI 0,4.
