Alarm w Pančicach

Pančicy-Kukow. Wjacore serbske wohnjowe wobory, mjez druhim z Pančic-Kukowa, Wotrowa, Žuric, Chrósćic, Smječkec a Worklec, buchu wčera wječor alarměrowane. Přičina bě pozdatny woheń w dźěłarni za zbrašenych w Pančicach-Kukowje. Kaž wuchowanska centrala we Wojerecach na naprašowanje SN zdźěli, bě kur z kachlow stupał, na čož je alarmowa připrawa zaskočiła. Paliło pak so njeje, tak zo wobory zaso wotjědźechu.

Dźak ministra do Slepoho

Slepo. Sakski statny minister za kultus Conrad Clemens je wčera Slepjanski šulski centrum wopytał. Wón dźakowaše so zhromadnje ze zastupjerjemi krajneho zarjada za šulu a kubłanje sobudźěłaćerjam za wobhladniwy wobchad ze zwadnym eksternym dźiwadłowym projektom w nalěću na wyšej šuli „Dr. Marja Grólmusec“. Dalšej temje běštej pobrachowacy wučerjo a powyšaca so ličba šulerjow.

Znowa mjez najlěpšimi