Berlin (dpa/SN). Kaž hižo minjene dny su njewjedra tež wčera wječor w Němskej z městnami wulke škody zawostajili. Wosebje na juhozapadźe mějachu pomocnicy ruce połnej dźěła.

W Bonnje je wohnjowa wobora nawječor wjace hač sto zasadźenjow zličiła, dokelž zachadźeše njewjedro ze zliwkami a wichorom. Předewšěm zapławjene pincy a spowalane štomy wohnjowych wobornikow zaběrachu. K tomu přińdźe šoferka, kotraž njemóžeše torhaceje wody dla ze swojeho awta. Wobornicy ju skónčnje wuswobodźichu. W Sankt Augustinje dyrbjachu wobchad měšćanskeje železnicy přetorhnyć, po tym zo běchu wjacore štomy na kolije padnyli.

Tež w Porynsko-Pfalcy njewjedra zachadźachu. W městomaj Sinzig a Remagen bě kanalizacija zliwkow dla přežadana, a dešćowa woda dróhi zapławi. Zwjazkowu dróhu B 9 pola Remagena su zawrěli. Techniski pomocny skutk dyrbješe skupinu dźěći, kotrež běchu při pućowanju njedaloko Remagena stanowali, njewjedra dla wotewzać.