Wo aspektach z wida SSW, na wólbach zwjazkoweho sejma so wobdźělić
Zjězd Južnoschleswigskeho wolerskeho zwjazka (SSW) njeje ani měsac nimo. Jeho wobzamknjenje, so jako strona Danow a Frizow klětu na wólbach Němskeho zwjazkoweho sejma wobdźělić, je na stronskej bazy hnydomne reakcije zbudźiło. Hač do kónca septembra su hižo tři wosoby swoju kandidaturu přizjewili. Wokrjesne předsydstwo SSW Sewjerna Friziska je Sybillu Nitsch, na zjězdźe w Flensburgu hakle za městopředsydku strony wuzwolenu, za kandidatku we wólbnym wokrjesu Sewjerna Friziska/Dithmarschenska-sewjer kaž tež za načolnu kandidatku SSW namjetowało. Městny zwjazk SSW Kiel/Pries/Klausdorf je swojemu předsydźe Marcelej Schmidtej při jeho kandidaturje we wólbnym wokrjesu Kiel wšu podpěru zawěsćił.