Dobre wukony překwapili

wutora, 31. julija 2018
artikl hódnoćić
(0 )

21. lěćny kurs za serbsku rěč a kulturu Serbskeho instituta su minjenu sobotu zakónčili. Milenka Rječcyna je so z nawodu kursa dr. Fabianom Kaulfürstom rozmołwjała.

Kotre dopóznaća maće z lětušeho kursa?

F. Kaulfürst: Najwažniši zaměr je, zo wobdźělnicy serbšćinu nawuknu. Zahoriło mje je, kelko su wosebje kursisća ze słowjanskorěčnym pozadkom w běhu dweju tydźenjow nawuknyli a nałožowali. Njezwučene bě, zo su wobdźělnicy z Pólskeje kaž tež z Čěskeje mjez sobu přewažnje serbsce, nic čěsce a pólsce, rěčeli.

Što běchu lětuše nowinki?

F. Kaulfürst: Julija Serbinec, Franciska Grajczarekec a Štefan Paška, studentce sorabistiki a student wučerstwa na Instituće za sorabistiku Lipšćanskeje uniwersity su prěni króć wuwučowali. Alenka Šmitowa nimo mje kurs hižo dlěje přewodźa. Prěni króć mějachmy priwatneho spěchowarja. Američan, potomnik Serbow Korla Wukaš, je třom wobdźělnikam stipendij za kurs přewostajił. Mějachmy tež wjacorych wobdźělnikow, kotřiž su z ryzy priwatnych přičin pódla byli.

Sće měli zaso wjace wobdźělnikow hač před lětomaj. Kotra bě za to přičina?

F. Kaulfürst: Bjez prašenja je to zniženje płaćiznow za kurs. Wosebje studenća njemóža sej dowolić so na nim wobdźělić, hdyž su płaćizny přewysoke.

Prěni króć mějachu wobdźělnicy składnosć, złožić rěčny certifikat po europskim referencnym ramiku. Kelko z nich je poskitk přiwzało?

F. Kaulfürst: Z 45 wobdźělnikow su pjećo schodźenk A1 kaž tež B1 a štyrjo schodźenk A2 złožili, jědnaćo docpěchu predikat jara derje a třo derje. Pruwowarce běštej wotrjadnica Manuela Smolina a wědomostna sobudźěłaćerka za rěčny marketing a wědomostne dźěło Jadwiga Kaulfürstowa z Rěčneho centruma WITAJ Budyšin. Wonej běštej překwapjenej wo dobrej a žiwej serbšćinje při pisanju lista resp. nastawka a w ertnym pruwowanju. Na kóncu přijachu wšitcy z rukow direktora Serbskeho instituta dr. Hauke Bartelsa wuswědčenje.

A kak bě to z kulturnym programom?

F. Kaulfürst: Za dopokaz, zo je so kursistam lubiło, mam zakónčacy wječork zańdźeny pjatk ze skupinu Sorbian Art Trio. Přitomni hosćo su so dźiwali, kelko serb­šćiny su wobdźělnicy nawuknyli. To su skupiny w krótkich scenach dopokazali. Šefredaktorka Rozhlada Sara Mičkec je krótkodobnje wo Rozhledźe powědała. To je priwatnej wosobje pohnuło wobdźělnikomaj abonement serbskeho kulturneho časopisa darić. Wosebje lubiłoj stej so wobdźělnikam ekskursiji do Trjebina a do katolskich Serbow, mjez druhim wopyt Božeje mšě w Chrósćicach a zwoblěkanje serbskeje katolskeje ­družki.

A što z programa je w Budyšinje wabiło?

F. Kaulfürst: W pomjatku wostał je mnohim přednošk Franca Čornaka wo pućowanju jako wandrowski po swěće. Jedyn wjeršk bě tež wopyt Budyskeho studija Sakskeho wuwučowanskeho a wukubłanskeho kanala (SAEK). Tam bě składnosć, hrać na kompjuteru hru „Krabat“ a film synchronizować. Překwapili su mje wobdźělnicy postupneje skupiny. Woni su natočili a třihali dialogi wo Janje a Madlence, kotrež běch za kurs spisał, a mi jako CD darili. Wutrobny dźak!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND