Serbske ideje lětsa we wjacorych „Čiń sobu!“-kategorijach mytowane

Drježdźany/Wojerecy (SN/at). Mjez 313 we łužiskim rewěrje mytowanymi projektami lětušeho idejoweho wubědźo­wanja Sakskeje „Čiń sobu!“ je 47 z wo­sebiteje kategorije „Žiwa dwurěčnosć“. Nimo toho su serbske cyłki zaměrnišo hač loni swoje zajimawe mysle tež w kategorijomaj „Přichod MINT“ za dźěći a młodostnych a „ReWir“ za ciwilnotowaršnostny angažement zapodali.

Dohromady je 1 149 zapodaćow dóšło. Loni bě jich 976, kaž Uwe Garack z Łu­žiskeho hospodarskeho regiona tzwr jako­ projektoweho nošerja zdźěli. „Předležace ideje móžeš z tymi lońšeho wu­bědźowanja přirunać. Jich kwalita je samo hišće přiběrała“, Garack wuzběhny. Jury wosebiteje kategorije měješe mjez 95 namjetami wuzwolić. Z nich běchu 45 małych, 22 drobnych, 14 srěnich pro­jek­tow kaž tež štyri wulke. Dźesać idejow měrješe so na wosebite myto. Loni bu w serbskej kategoriji wubědźowanja „Čiń sobu!“ 125 idejow zapodatych.