Za minjenu sobotu předwidźany wosebity zjězd Južnoschleswigskeho wolerskeho zwjazka (SSW) njeje so aktualnje płaćiwych wobmjezowanjow koronapandemije dla wotměł. Jako hłowne ćeži­šćo chcyše SSW wobzamknyć, hač so na klětušich wólbach zwjazkoweho sejma wobdźěli.

Flensburg (SN/at). Prěnjotny termin zjězda­ 6. junija dodźeržeć njebě móžno. Kaž krajny sekretar SSW Martin Lorenzen rjekny, chcedźa wažnu naležnosć na stronskim zjězdźe 19. septembra w Flens­burgu rozjimać a wobzamknyć. „Korona je kaž wšudźe druhdźe tež dźěło SSW zlemiła. Wot měrca njejsmy w stronje žane zarjadowanja ze sobu­stawami přewjedli. Hakle tydźenja smy w małym kruhu zaso fyzisce wuradźowali“, wopisuje wón aktualne połoženje.