3. julija 1990 pisachu Serbske Nowiny na sportowej stronje, zo maja w koparskich rjadach Sokoła Ralbicy/Hórki dwě zesylnjeni. Wot spočatka pražnika je za delanskich koparjow zaso wrotar Manfred Wencl ze Skaskowa zasadźeny. Wencl bě hižo raz w Ralbicach kopački šnórował, po tym pak zaso doma w Skaskowje. Maik Brězan je so z nim rozmołwjał.
Manfredo, sy so před někak 30 lětami druhi raz mustwu Sokoła Ralbicy/Hórki přidružił. Što běchu přičiny za změnu a hdźe sy hižo wšudźe w swojej karjerje hrał?
M. Wencl: Mój druhi hrajny čas w Ralbicach započa so 1. julija 1990. Z něhdźe 35 lětami běše to mój najrjeńši a najwuspěšniši. Nowaj trenarjej Beno Cuška a Ludwig Dinar staj mje runje tak wutrobnje witałoj kaž sobuhrajerjo a přiwisnicy. Zrosćechmy do kruteho cyłka. Podźěl na tym mějachu naše mandźelske a dźěći, z toho čerpachmy mocy, a wuslědk běše 1991 postup do wobwodneje ligi.