Premjera Serbskeho młodźinskeho dźiwadła festiwal a sezonu zahajiła
Budyšin (SN/CoR). Ze serbsko-němskorěčnej premjeru zhromadneje produkcije Serbskeho młodźinskeho dźiwadła a Kamjentneho domu „Prěki – durich – loborka“ njejsu wčera jenož nowu hrajnu dobu Budyskeho NSLDź na hłownym jewišću zahajili, ale zdobom 3. festiwal „Witajće druhdźe“ ze šěsć amaterskimi młodźinskimi skupinami z cyłeje Němskeje a Irskeje. „Smy hordźi, zo móžemy skónčnje wot měrca přesunjeny projekt předstajić. Wosebitosć je, zo hraja tu Serbja a Němcy hromadźe we woběmaj rěčomaj“, witaše intendantka za serbske dźiwadło Madleńka Šołćic přihladowarjow zbliska a zdaloka na wupředatej žurli. „Dźiwadło njewotbłyšćuje woprawdźitosć, ale předstaja swět, kajkiž móhł być“, rozłoži intendant Lutz Hillmann w swojich witanskich słowach. „Hornja Łužica steji za mnohotnosć. Dźakuju so intendantej za zmužitosć, z tutym festiwalom dźiwadłowu sezonu w Hornjej Łužicy zahajić“, wuzběhny přirjadnica Budyskeho krajneho rady Birgit Weber.