Nowe wopomnišćo w Koslowje dopomina tež na padnjenych wjesnjanow a na pomoc Serbskich brigadow
Wosrjedź polow, łukow a lěsow rozpřestrěwa so při dróze z Njeswačidła do Kamjenca po štyrjoch kilometrach mała serbskokatolska wjes Koslow, 1974 do Njeswačanskeje komuny zagmejnowana. Njedaloko Koslowa su něhdźe 40 hektarow wulke Łučne haty‚ kotrež su wot lěta 1967 přirodoškitna kónčina. Nadeńdźeš tam rědke wódne rostliny, tójšto družin zwěrjatow, mjez nimi ptačkow. Mnohostronskosć wegetacije na wuskim rumje skići rědkim ptakam přirodny schow, tak tež žorawjej, kotryž je symbol Koslowa. Wšako porik žorawjow we wjesce hnězdźi. Wšelake družiny kačkow na wodźe abo w rohodźi wuhladaš, tohorunja čorneho milana a rapakow. Njezadźiwa tuž, zo mnohich lubowarjow přirody do krajiny wokoło Koslowa do pućowanja wabi. Wjes ze 26 rjanymi statokami na woběmaj bokomaj dróhi z Njeswačidła do Sernjan a dale do Kamjenca a z kulturnym domom „K žorawjej“ je tohorunja parlička a dopokaz pilnosće jeje něhdźe sto wobydlerjow.