Budyšin (SN/at). Njewšědny čas njewšědne projekty rodźi. Tajki mjezykulturny z mjenom „Ow, jědlenka ...“ je wot Sahila Kahna a Bettiny Renner, kotraž bě projekt nastorčiła a jón nawjeduje. Kahn, sam ćěkanc, přebywaše dwě lěće w lěhwje Moria a je nětko w grjekskej stolicy Athenje zaměstnjeny. Kulturny běrow města Budyšina a Kulturna załožba Swobodneho stata Sakskeje předewzaće spěchujetej, wo kotrymž su wčera a dźensa wustajeńcu natwarili.
Kaž Budyski kulturny běrow informuje, mnohe dźěći w grjekskim lěhwje ćěkancow Malakasa hody poprawom njeznaja, dokelž njeje tónle swjedźeń wobstatk jich kultury. Najebać to pak su nam wosebite hodowne postrowy paslili. Kak pak sej hody z tudyšimi tradicijemi wot hodowneho štoma hač k poprjancam předstajeja? Dwaj dnjej su dźěći a młodostni paslili. Připódla słuchachu na pěseń wo jědlence a na stawiznički wokoło hód a běchu zahorjeni.