Sakscy Zeleni z toho wuchadźeja, zo z wobdźělenjom akceptancu tworiš

Budyšin/Drježdźany (SN/at). Z nowym lětom so na dale napjatym połoženju koronapandemije dla ničo bytostne nje­změni. Před wirusom so škitać, k tomu namołwjataj čěski wonkowny minister Tomáš Petříček a sakska statna ministerka za socialne a towaršnostnu zwjazanosć Petra Köpping (SPD) w nowinskej zdźělence. „Chcemy čěskich a sakskich wobydlerjow zhromadnje před sćěhami schorjenja na koronawirus škitać. Toho­dla koordinujemoj tež mjezu překročacy bój přećiwo pandemiji.“ Köpping kaž ­Petříček drje wěstaj, zo trěbne naprawy mjezu překročacy wobchad wobmjezuja, „smój pak přeswědčenaj, zo su wone trěbne“. Minister a ministerka wabitaj za nowe rjadowanje, kotrež předwidźi za dojězdźowarjow z wobeju krajow a překročerjow mjezy wot 11. januara znajmjeńša tydźensce dwaj testaj. Rjadowanje ma ludnosć škitać. Wobě stronje so dale wusko wothłosujetej. Ručež to infekciske połoženje dowola, chcetej wonej prawidła powólnić.