Čornochołmčanske kulturne předewzaće z nowymi narokami
Čorny Chołmc (SN/MiR). Čestnohamtsce w pozadku skutkowacych bóle do srjedźišća stajić, je zaměr Kulturneho centruma Krabatowy młyn w Čornym Chołmcu. Na zarjadowanju Krabat-Magica rjekny Anton Fuchs na naprašowanje SN: „Naš zaměr běše, tři dny mjez hodami a silwestrom młyn ze žiwjenjom pjelnić. Za přichod smy sej předewzali, z tajkimi zarjadowanjemi čestne zastojnstwo sylnić. Chcemy tych, kotřiž su zašłe lěta skerje w pozadku skutkowali, widźomnych sčinić.“ Jedyn z nich je Willi Kotissek z Brětnje. Přichadźacym wopytowarjam flajer z pokiwami rozdawajo wón praji: „Krabatowy młyn je wulke wobohaćenje našeje domizny. Raduju so, zo sym tónkróć nimo mnohich dalšich pomocnikow jako młynski pódla.“