Smjerdźaca (lmc/SN). Mjeztym, zo tón abo tamny w oktobru w dešćikojtej a zamróčenej domiznje přebywaše, běchu sej čłonojo Serbskeje rejowanskeje skupiny Smjerdźaca na słónčnu kupu Malta wućeknyli. Tam wobdźělichu so na mjezynarodnym folklornym festiwalu. Za 25 serbskich wobdźělnikow, mjez nimi šěsć hudźbnikow, so wón minjeny pjatk z pisanej paradu přez hłowne město Valletta a prěnim wustupom na jewišću zahaji.

Dohromady 16 skupinow – přewažnje z balkanskich regionow – so wobdźěli, mjez druhim ze Serbiskeje, Makedonskeje, Bołharskeje a Italskeje. Hižo prěni dźeń w starych měšćanskich hasach połnych pisanych drastow a žiweje hudźby běše krasny wuraz zahoritosće za kulturu a žiwjensku radosć.

Sobotu běše Smjerdźečan skupina w měsće Żejtun na wuchodźe Malty na wopyće. Hižo po prěnich krokach na jewišću běše rejowarkam a rejowarjam jasne: Wone je přehładke! Tak rejowachu bjez črijow dale. Wječor běchu woni w magiskej atmosferje wuskich, ze stami swěčkow wobswětlenych hasach po puću.