Wien. Njewotwisna komisija fachowcow w nadawku awstriskeho nutřkowneho ministerstwa je zwěsćiła: Policija je njepřiměrjenje, njezakonsce a dwělomnje přećiwo mjezynarodnemu antifašistiskemu campej kluba słowjenskich studowacych w gmejnje železná kupla zakročiła. Štyri hodźiny trajaca akcija policistow 27. julija (SN rozprawjachu) bě razne reakcije a kritiku zbudźiła. Tež městopředsyda Domowiny dr. Hartmut Leipner, mjeztym tohorunja wiceprezident europskeho třěšneho zwjazka narodnych mjeńšin FUEN, je so přećiwo zachadźenju zwuraznił. Słowjency w Korutanskej běchu rozhorjeni, wšako přewjedźechu kubłanske zarjadowanje młodostnych na wopomnišću Peršmanhof, hdźež spominaja na jedne z poslednich złóstnistwow we wójnje 25. apryla 1945. Tehdy zamordowa policajski regiment SS jědnaće ludźi słowjenskeju swójbow. Policija je po lětušej zwadnej akciji twjerdźiła, zo běše pohórškow z ludnosće ilegalneho stanowanja dla. Kaž ze zakónčaceje rozprawy fachoweje komisije zašły tydźeń wuchadźa, njeje pak w aktach žanych tajkich pohórškow registrowanych.