Dobre šansy za sakske předewzaća w USA

wutora, 12. februara 2019 spisane wot:

Budyšin (CS/SN). Hospodarske prašenja a naležnosće swětoweje politiki stejachu w srjedźišću foruma w Budyskim hotelu „Residence“, na kotrymž bě zapósłanc FDP Torsten Herbst składnostnje wopyta generalneho­ konsula USA Timothyja Eydelnanta­ minjeny štwórtk přeprosył.

Hósć skoržeše, zo dyrbja USA we wěstotnej politice najwjetše poćežowanja znjesć, a sej zdobom žadaše, zo dyrbjeli kraje Europskeje unije dwaj procentaj swojeho nutřkokrajneho bruttoprodukta za zakitowanje wudać. Tež w hospodarskej politice njeje žaneje runowahi. W Němskej wjele kritizowany prezident USA Donald Trump njeje diplomatam lochki partner, dokelž njeje rodźeny politikar, ale předewzaćel. Přiwšěm, Eydel­nant­ zwurazni, je Trump woleny, a tuž dyrbja sej to wšitcy někak zarja­dować. USA su dźensa bóle pačene hač prjedy, štož pak tež za Europu płaći.

Za swobodne wólby

wutora, 12. februara 2019 spisane wot:
Cartagena (dpa/SN). Zwjazkowy prezident Frank-Walter Steinmeier wupraja so za swobodne prezidentske wólby we Venezueli. Bjezposrědnje po přizemjenju w kolumbiskim Cartagenje Steinmeier hladajo na dezolatne hospodarske połoženje a špatne zastaranje ludźi we Venezueli rjekny, zo móhł jenož na wěrjomnym a legitimnym zakładźe woleny prezident ludźom nowu nadźiju spožčić.

To a tamne (12.02.19)

wutora, 12. februara 2019 spisane wot:

Lubosćinska hodźinka w cuzym awće je so za młody porik ze stresom skónčiła. Wobaj běštaj so krótko do toho w diskotece zeznałoj. Pytajo za samotnym městnom wuhladaštaj wječor parkowacy Pkw wosrjedź Mnichowa, kotryž njebě zamknjeny. Wjeselo pak bě nimo, jako pytnyštaj, zo njehodźachu so durje wotnutřka wjace wotewrěć. W nuzy alarmowaštaj wonaj policiju, kotraž jeju wuswobodźi. Znate wšak njeje, kotre sćěhi to za 27lětneho a 26lětnu změje. Awto dyrbjachu wot­wlec, dokelž njehodźachu so durje po „wuswobodźenskej“ akciji wjace zamknyć.

Hrajkacy pos je w bydlenskim domje na juhu Israela woheń zawinił. Na wideju stražowanskeje kamery je widźeć, kak sej tón na werandźe ležo ze zapalakom hrajka. Naraz pak płomjenja wudyrja a so spěšnje rozpřestrěwaja. Pos na woheń wudźěra a šćowka. Wohnjowa wobora drje móžeše płomjenja podusyć, škoda w bydlenju je přiwšěm chětro wulka.

Kooperacija při wučbje

póndźela, 11. februara 2019 spisane wot:

Drježdźany (B/SN). Krajna cyrkej Sakskeje a biskopstwo Drježdźany-Mišno chcetej při šulskej nabožinskej wučbje wušo hromadźe dźěłać. Tohodla ma so naj­pozdźišo wot šulskeho lěta 2020/2021 konfesionelno-kooperatiwna nabožinska wuč­ba poskićić, praji ewangelski krajny biskop Carsten Rentzing w Drježdźanach. Hromadźe z katolskim biskopom Heinrichom Timmereversom předstaji Rentzing prěni raz pozicisku papjeru „Konfesionelna kooperacija w nabožinskej wučbje w Swobodnym staće Sak­skej“. Wučbna maćizna leži w zhromadnej zamołwitosći, při kotrejž njejedna pak so wo ekumenisku nabožinsku wučbu­, podšmórnyštaj wobaj biskopaj. Konfesionelne rozdźěle maja so jasnje wu­zběhnyć. Tak nastanje nimo ewangelskeje a katolskeje nabožiny třeća forma nabožinskeje wučby.

Ćežke časy za křesćanow

Zastrow ze špatnym wuslědkom

póndźela, 11. februara 2019 spisane wot:

Annaberg-Buchholz (dpa/SN). Sakska FDP poćehnje z předsydu Holgerom Zastrowom na čole do wólbow krajneho sejma 1. septembra. To su delegaća stronskeho zjězda w Annabergu-Buchholzu wobzamknyli. Přiwšěm dyrbješe Zastrow špatny wuslědk wothłosowanja akceptować: Jenož 62,2 procentaj přitomnych za njeho hłosowaštej. Lěta 2014 bě Zastrow hišće 90,2 proc. nažnjał.

AfD chce do knježerstwa

Markneukirchen (dpa/SN). AfD w Sakskej so na to hotuje, po wólbach krajneho sejma 1. septembra knježerstwowu zamołwitosć přewzać. Na zjězdźe, hdźež nastajichu krajnu lisćinu za wólby krajneho sejma, čłonojo potwjerdźichu, zo chcyli „módru změnu“ w kraju a zo maja islam za wulke wohroženje němskeje kultury. Načolny kandidat je krajny a frakciski šef Jörg Urban. 54lětny dósta w Markneukirchenje 84,5 procentow hłosow delegatow. Po woprašowanjach móže so AfD w Sakskej 25 proc. hłosow nadźijeć, štyri procenty mjenje hač CDU.

SPD chcyła Hartz IV wotstronić

Merkel nětko čestna wobydlerka

póndźela, 11. februara 2019 spisane wot:

Templin (dpa/SN). Zwjazkowa kanclerka Angela Merkel (CDU) je wotnětka čestna wobydlerka jeje domizniskeho města Templina. Na tradicionalnym nowolětnym přijeću mecklenburgsko-předpomorskeho města jej minjeny pjatk tajku česć spožčichu. K tomu bě něhdźe 120 prošenych hosći do tamnišeho multikulturneho centruma přichwatało. Po informacijach měšćanosty Detlefa Tabberta (Lěwica) steješe zarjadowanje lětsa pod hesłom „Młodźina a kubłanje“.

Spožčenje čestneho wobydlerstwa bě přewodźane­ wot protestneje akcije z něhdźe sto wobdźělnikami. Demonstraciju bě wobydler města pod hesłom „Nic moja čestna wobydlerka – nic moja kanclerka“ přizjewił. Po spožčenju myta zapisa so Angela Merkel­ do čestneje knihi města a přija čestne wopismo a kwěćel. Wo ćělne derjeměće postara so pjekarnja z Templina.

Dźěłarnička ma namjety zdźěłać

póndźela, 11. februara 2019 spisane wot:

Berlin (dpa/SN). We wobłuku „dźěłarniskeje rozmołwy“ z praktikarjemi a wědomostnikami chce CDU dźensa reformowe namjety za němsku a europsku migracisku politiku předpołožić. Wodźacy zastupnicy CDU a CSU chcychu z něhdźe sto prošenymi hosćimi w štyrjoch dźěłowych skupinach wo migraciji, wěstoće a integraciji diskutować. Zdźěłać maja woni namjety, kotrež parlamentej a zwjazkowemu knježerstwu přepodadźa. Zwjaz­kowa kanclerka Angela Merkel (CDU) njebě na debaće wobdźělena.

Předsydka CDU Annegret Kramp-Karrenbauer je wčera wječor zhromadnje z předsydu CSU Jaochimom Herrmannom k zahajenju dwudnjowskeje dźěłarnički potwjerdźiła, zo chce migracisku politiku reforměrować. Při tym matej wobě stronje wšelake ćežišća. CDU chcyła migracisku politiku w cyłoeuropskim dorozumjenju zwoprawdźić. CSU sej porno tomu žada, migrantow, kotřiž do Němskeje přińdu, sylnišo kontrolować. Karrenbauer warnowaše, ze swojowólnymi naprawami jednotu Europy wohrozyć.

Wjetšina nochce bjez awta być

póndźela, 11. februara 2019 spisane wot:

Berlin (dpa/SN). Najebać diskusiju wo škiće klimy a wo škódnych maćiznach w powětře je po wuslědkach najnowšeho naprašowanja jenož mały dźěl šoferow zwólniwy so jězdźenja z awtom wzdać. Nimale dwě třećinje woprašanych (63,9 procentow) wotmołwi na wotpowědne prašenje ze „skerje nic“ abo „na žadyn pad“, kaž wčera wozjewjene naprašowanje Berlinskeho dźenika „Tagesspiegel“ wunjese. Jeno­ 27,7 procentow móhło sej to předstajić. Zdobom tři štwórćiny kritizuja, zo zwjazkowe knježerstwo přemało za bliskowobchad a za kolesowarjow čini. Prašeli běchu so 2 500 ludźi.

Předewšěm we wjesnych kónčinach nochce – abo njemóže – nichtó bjez awta być. Porno tomu je to w městach wjace hač połojca. Předewšěm wolerjo Zelenych (dobre 60 procentow) a Lěwicy (nimale 50 proc.) móhli sej žiwjenje bjez awta­ předstajić. Porno tomu njeje za 73,3 procenty přiwisnikow CDU/CSU a 80,3 proc. wolerjow FDP – mjez wolerjemi AfD samo 86,9 procentow – wšědny dźeń bjez awta předstajomny. Powšitkownje bě zwólniwosć, so awta wzdać, na wuchodźe mjeńša hač na zapadźe.

To a tamne (11.02.19)

póndźela, 11. februara 2019 spisane wot:

Po spektakularnej jězbje po past­wach, mostach­ a samo awtodróze je wusłužene lětadło Boeing 747 w Nižozemskej swój posledni cil docpěło: zahrodu hotela njedaloko Amsterdamskeho lětanišća Schiphol. Mašinu chcedźa nětko na atrakciju za hosći přewarić. Transport je hotel miliony eurow płaćił a tójšto wušparanjow načinił: Tak dyrbjachu burow za wužiwanje łukow wotškódnić, trjebachu njesměrnje wjele zarjadniskich dowolnosćow a dyrbja nimo toho dosć drohi transport zapłaćić.

Tři měsacy bě wona swobodna – nětko su ćeknjenu kruwu „büxi“ zaso popad­nyli. Bywši policist, kiž zdobom hońtwjeri, je skoćo njedaloko bayerskeho Landshuta z kłokom pohłušił. Škitarjo zwěrjatow je na to wotewzachu a zastarachu. Kruwa bě so prawidłownje wječor při picnym składźe ratarskeho zawoda posłužowała. Tam je policist z třělbu na nju łakał. Büxi bě w oktobru ćeknyła.

Stawki tež w Sakskej

pjatk, 08. februara 2019 spisane wot:

Drježdźany (dpa/SN). W tarifowym konflikće w zjawnej słužbje krajow su dźěłarnistwa w Sakskej za přichodny tydźeń warnowanske stawki připowědźili. Wot wutory měło so dźěło we wjacorych regionach złožić, dźěłarnistwje GEW a ver.di dźensa zdźělištej. Spočatnje su přistajeni kraja w sewjernej Sakskej a Lipšćanskej kónčinje namołwjeni. Štwórtk wočakuja stawki w Drježdźanach a Budyšinje. Dźěłarnistwo žada sej šěsć procentow wjace mzdy, znajmjeńša pak 200 eurow.

Nowa centrala tajneje słužby

Berlin (dpa/SN). Nimale jědnaće lět po połoženju zakładneho kamjenja je zwjazkowa kanclerka Angela Merkel (CDU) dźensa nowu centralu zwjazkoweje tajneje słužby BND w Berlinje wotewrěła. Zaćahnyli běchu prěni sobudźěłaćerjo hižo w januaru. Tak ma w Berlinje nětko 4 000 z cyłkownje 6 500 sobudźěłaćerjow tajneje słužby městno. Techniski wotrjad wostanje dale w bayerskim Pullachu. Nowo­twar bě wjace hač miliardu eurow płaćił, zaplanowali běchu 750 milionow.

Policija: Žane zapalerstwo

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND