Wotchadnička w USA wotprajena
Los Angeles (dpa/SN). Hladajo na napjate protesty na uniwersitach USA Gazaskeje wójny dla je University of Southern California w Los Angelesu planowane zarjadowanje składnostnje wotchadnički absolwentow wotprajiła. Pokazujo na wěstotne połoženje njemóže so planowany event na hłownym jewišću, na kotryž wočakowachu 65 000 ludźi, wotměć, uniwersita w Kaliforniskej zdźěla.
W USA su so demonstracije na dobro Palestinjanow na uniwersitach rozšěrili a zdźěla přiwótřili. Wčera wječor je policija w Los Angelesu wjace hač 90 ludźi zajała, kotřiž běchu za čas demonstracijow teren uniwersity wobsadźili a na priwatnej ležownosći stany nastajili. Demonstranća zwuraznja swoju solidaritu z palestinskim ludom w Gazaskim pasmje. Uniwersita wumjetuje jim antisemitizm
250 hodźin hudźby na 52. dixie-festiwalu
Drježdźany (JM/SN). Sakska krajna stolica hotuje so znowa na kulturny wjeršk, kiž kóždolětnje dźesaćitysacy hosći nawabja: na mjeztym 52. mjezynarodny dixi-festiwal wot 12. hač do 19. meje 2024. Wo nadrobnosćach wosom dnjow trajaceho sławneho hudźbneho eventa su předwčerawšim, srjedu, na nowinarskej konferency informowali.
Cyłkownje 38 skupin a solistow z dźesać krajow so lětsa wobdźěli. Organizatorojo planuja 44 zarjadowanjow z 250 „hudźbnymi hodźinami“, bjez přidawkow. Wosebje wažne: Nimale połojcu muzikaliskeho časa móža přihladowarjo darmotnje dožiwić. Jedyn z wjerškow je jazzowa mila na Praskej dróze w Drježdźanach njedźelu, 19. meje. Kruće zaplanowana je tež parada skupin samsny dźeń wokoło Brühlskich terasow.
Nimo wulkich centralnych zarjadowanjow přihotuja tež hudźbne dožiwjenja za swójby kaž koncert w zwěrjencu, wosebite zarjadowanje za dźěći w kulojtym kinje, koncert skupin w kulturnym palasće abo gala pod hołym njebjom na jewišću w Młodej gardźe.
To a tamne (26.04.24)
Psa na jewišću dźiwadła w Ulmje přihladowarjo nětko tola widźeć njebudu. Weterinarny zarjad města je zasadźenje psa w inscenaciji „Lessons in Love and Violence“ wotpokazał. Štyrinohač měješe při wustupje solistki něhdźe 15 mjeńšin jej poboku na jewišću stać. Na castingach běchu psy měrnje wostali. Najebać to je weterinarny zarjad měnjenje, zo je hara orchestra za nje přewulka.
Na wšě 84 kilogramow zawarjenych peperonijow při sebi měješe paduch w swojej karje, jako jeho policija w Bremerhavenje kontrolowaše. Wotkal 23lětny peperonije we wjacorych kanistrach měješe a dokal z nimi chcyše, njemóžeše wón zastojnikam „plawsibelnje“ rozkłasć. Policija je tuž přepytowanje padustwa dla zahajiła a pyta za wobsedźerjom žiwidłow. Prawdźepodobnje pochadźeja peperonije ze składa hosćencarja abo wobchoda wulkowikowarja.
Lindner: Wjace pjenjez klětu
Berlin (dpa/SN). Zwjazkowy financny minister Christian Lindner (FDP) je za klětu připowědźił, dźěćacy pjenjez zwyšić. Móžnu ličbu wón njemjenowaše. „Dyrbimy rozprawu wo eksistencnym minimumje přichodnu nazymu wočaknyć“, rjekny Lindner nowinarjam. Dźěćacy pjenjez su po jeho słowach hižo 2023 „jara raznje a nadpřerěznje“ zwyšili, zo bychu swójbam pomhali. Tohodla je hakle 2025 přichodne zwyšenje móžne.
Pruwuja imunitu Trumpa
Washington (dpa/SN). Najwyše sudnistwo USA zaběra so dźensa z prašenjom, hač je bywši prezident USA Donald Trump za podawki za čas zastojnstwa před sudniskim přesćěhanjom wěsty abo nic. Sudnicy Supreme Court chcychu argumenty wobeju stron w tymle prašenju słyšeć. Z wusudom liča hakle přichodne tydźenje. Trumpa dźensa njewočakowachu. Wot rozsuda sudnikow wotwisuje, hač a hdy proces přećiwo Trumpej wólbneho wobšudnistwa dla zahaja.
Israel plany ofensiwy změnił
Pilotowy projekt policistow na kolesu je Zhorjelska policajska ...
Klimowy dialog krajow w Berlinje
Widejo zastajenca protesty zbudźił
Zelenskyj dźakuje so USA za pomoc
Kijew (dpa/SN). Ukrainski prezident Wolodymyr Zelenskyj je wolóženy na pomocny paket reagował, kotryž bě prezident USA Joe Biden připowědźił. „Dóstanjemy podpěru, kotruž trjebamy, zo bychmy swoje žiwjenje před ruskimi nadpadami škitali“, piše Zelenskyj na swojej internetnej stronje. Biden bě bjezposrědnje po rozsudźe kongresa USA na dobro dalšeje pomocy přikazał, brónje tak spěšnje kaž móžno do Ukrainy pósłać. Pomocny paket wopřija techniku za powětrowy škit, artileriju, raketowe systemy a pancerowane jězdźidła. Wosebje wažne su po ukrainskich informacijach granaty wšelakich kalibrow za artileriju a rakety přećiwo ruskim lětadłam.
Hišće njejasne je, hač móža rakety ameriskeho systema ATACMS, kotrež Ukraina tohorunja dóstanje, 300 kilometrow daloko lećeć abo jenož 160. Daloko sahace rakety móhła Ukraina tež přećiwo objektam na teritoriju Ruskeje zasadźić, kaž přećiwo mostej na kupu Krim. USA tole nochce, zo njemóhła jej Ruska direktne wobdźělenje na wójnje wumjetować.
Społnomócnjenaj wotstupitaj
Předźěłanje znjewužiwanja w Augsburgskim biskopstwje kritizowane
Augsburg (dpa/SN). Njewšědny to podawk: W Augsburgskim katolskim biskopstwje staj dwaj z cyłkownje třoch społnomócnjenych za předźěłanje padow splažneho znjewužiwanja swoje zastojnstwo złožiłoj: Diplomowej psychologaj Angelika Hauser a Rupert Membarth wčera nowinarjam zdźělištaj, zo swoje dźěło kónc apryla zakónčitaj. Wonaj wumjetujetaj nawodnistwu biskopstwa pobrachowacu wolu, podawki woprawdźe wujasnić.
„Bohužel njemóžachmoj spóznać, zo splažne znjewužiwanja w Augsburgskim biskopstwje, kotryž je biskop Bertram swój čas ‚wutrobitu naležnosć‘ mjenował, woprawdźe z trěbnej chutnosću a sprawnej wolu přeslědźeja“, cituje nowina Augsburger Allgemeine wěcywustojneju nawodnistwa biskopstwa.
Prašenje wodźenja
Diskusija wo spomóžnych a njespomóžnych aspektach turizma w mjeńšinowych kónčinach je kompleksna, to sym tež na wčerawšim posedźenju zastupjerjow europskich mjeńšin w Lubnjowje dožiwił. Tak mjenowany „nadturizm“ je problem, kotryž wutłóči domoródnych z jich namrětych sydlišćow. W Błótach tutón strach hižo hrozy. W tamnych dźělach Łužicy pak je skerje nawopak. Tam móhło wjace turistow lokalne hospodarstwo přisporjeć. Nimo toho móhł prawy kulturny turistiski koncept jich zajim za Serbow budźić.
Dobremu rozrisanju hladajo na to by intensiwna kooperacija mjez turistiskimi towarstwami a zjednoćenstwami po cyłej Łužicy tyła, z cilom, prudy turistow specifisce „kanalizować“. Za směrodajny přikład mam turistiski koncept towarstwa Serbski kulturny turizm: kolesowansku šćežku „Łužiske impresije“. Ze serbskimi temami wjedźe něhdźe 500 kilometrow dołha čara po Hornjej, srjedźnej a Delnjej Łužicy. Milan Pawlik
