Hochozy (SN/MkWj). Štóž je hdy prěni dźěl mjezynarodneho folklorneho festiwala w Hochozy dožiwił, móže potwjerdźić: To je zarjadowanje z cyle wosebitej atmosferu: přećelne, wotewrjene, sympatiske.

Tak je to pjatk tež skupina 45 zajimcow z Radworja a Chrósćic dožiwiła, kotraž bě sej z wot Domowiny skazanym busom Radworskeho Šmitec wozydłownistwa do Hochozy dojěła. Festiwalne wjerški běchu na štyri statoki, podobnje kaž w Chrósćicach, rozdźělene. Tam wustupowachu folklorne skupiny ze swo­jimi programami. Mjez statokami jězdźeštej konjacej zapřahaj za hosći, kotřiž nochcychu abo njemóžachu puć mjez dworami pěši zmištrować. Wo zastaranje postarachu so młodźinski klub, wohnjowa wobora a z Budyšina přichwatani ­pomocnicy Nukec napojownistwa.

Hnydom na spočatku wsy na puću z Choćebuza přeprošowaše Ungerec statok. Na skerje małym, ale jara rjanym dworje prezentowachu so słowakski ansambl Gymnik, Legnica z Pólskeje a serbski folklorny ansambl Serbska reja.

Chrósćicy (SN/bn). Zjawny kulturny forum słuša mjeztym ke krutym programowym dypkam Mjezynarodneho folklorneho festiwala „Łužica“. Lětsa předstajichu so w tym wobłuku zastupjerjo sydom na swjedźenju wustupowacych skupinow zawčerawšim w Chróšćanskej wjacezaměrowej hali „Jednota“ z krótkimi prezentacijemi.

Praju to runjewon: Sym přemóžena – a to nic prěni króć, ručež na festiwal myslu. Njeńdźe wo swjedźeń samo na sebi, ale wo tych něhdźe sto ludźi, kotřiž w pozadku dźěłaja, kotřiž wěstotu a strowotu zaručeja, wobchad rjaduja a tak dale. Woni su wšu swoju dźěławosć ze zapalom a entuziazmom za wusahowacy wjeršk kulturneho a towaršnostneho serbskeho žiwjenja zdokonjeli. Jasne je: bjez nich njeby Domowina jako wuhotowarka festiwala móhła na tutón swjedźeń přeprosyć. Mam nadźiju, zo je so do pjenježneho měška telko eurow nazběrało, zo móže zarjadowarka čestnohamtskich na wosebity dźakny swjedźeń přeprosyć. Myslu při tym na tych, kiž su nuzniki rjedźili, wotpadki zběrali, wobchad rjadowali, dźěći z wodu popryskali a tak dale. Přetož za dwě lěće budźe přichodny folklorny festiwal. A Chrósćicy swjeća 800 lět prěnjeho pisomneho naspomnjenja wosady. Za to budźe wěsće wjace hač sto pomocnikow trěbnych ... Milenka Rječcyna

Chrósćicy (SN/MG). Na tak mjenowanym „Festiwalnym specialu“ su cyłki folkloru na cyle hinaše wašnje interpretowali. Prěnja tajka skupina bě serbska band ­Nowa Doba, kotraž je znata za swoje produkcije hiphopa. Na Zahrodnikec/Grutkec statoku prezentowachu woni spěwy swojeho prěnjeho albuma „Stara šula“. Na jewišću móžeše publikum, kotryž bě we wulkich masach na dwór přichwatał, nimo hudźbnikow tež někotrehožkuli hosća wuhladać. Tak zaspěwa Greta ­Čórlichec z trójku. Samy wjeršk koncerta pak bě bjezdwěla zhromadna produkcija z Přezpólnymi. Jako stupichu mužojo a žonje w swojich tradicionelnych drastach na jewišćo a zahudźichu zhromadnje z band k modernym zynkam, bě nalada přewšo euforiska.

Přichodny wjeršk wječora bě band ­Celtica, kotraž wobkuzła publikum ze swojimi twjerdymi zynkami, kotrež produkuja na přikład z tradicionelnymi ­šotiskimi dudami. Show na jewišću bě přewšo spektakularna, wšako wědźa hudźbnicy cyle dokładnje, kak maja swětłowe, ale tež specialne efekty wužić.