Sport (24.06.16)

pjatk, 24. junija 2016 spisane wot:

Přihoty Budissy na nowu sezonu

Regionalny koparski ligist Budissa Budyšin so hižo na nowu hrajnu dobu 2016/2017 přihotuje. Tule krótki přehlad:

05.07. 18.30 hodź. hra přećiwo Halleskemu FC (njeje hišće jasne)

07.07.–10.07. treningowe lěhwo w Budyšinje

10.07. 17 hodź. hra přećiwo Nowosólcej-Hródkej w Nowosólcu-Hródku

13.07. 18 hodź. wotewrjenje sezony w Bu­dyšinje, hra přećiwo FSV Zwickauwej

16.07. 18 hodź. hra přećiwo mustwu International Lipsk we Wjelećinje

Koparske dypkowe hry

26.06. 15 hodź. Radwor – ST Budyšin

15 hodź. Ralbicy II – Bluń

15 hodź. Němske Pazlicy – Mar. hwězda

Pojědu wo europsku krónu

25. a 26. junija budźe MC Hornja Łužica Hórski kraj 14. raz hosćićel běha wo europsku­ krónu awtocrossa. Lětsa liča we Wuhančicach-Koblicy z něhdźe sto jězdźerjemi ze 16 krajow. Domjacy startuja z wosom lokalnymi matadorami. Wubědźowanja wotměja so w kategorijach Junior buggy, Touring AX, Buggy 1600 a Super buggy.

Jěchanski a skakanski turněr

Zapodadźa spěchowansku próstwu

pjatk, 24. junija 2016 spisane wot:

Sankt Martin in Thurn/Bruneck (SN/JaW). Němcy z Južneho Tirola maja dale šansu, třeći króć koparske mišterstwa awtochtonych narodnych mjeńšin Europy dobyć. Woni porazychu wčera Madźarow z Rumunskeje 6:1 a steja w połfinalu. Tam nastupja přećiwo Korutanskim Słowjencam. Ći su Němcow z Ruskeje ze 6:3 zbili. Tež Chorwaća ze Serbiskeje a Okcitanojo su dale, přewinywši Ladinow z 2:0 resp. Madźarow ze Słowakskeje z 5:3.

Paris. Na europskich koparskich mišterstwach w Francoskej njejsu wčera hrali, dźensa tež nic. Skupinska faza je zakónčena. Trenar turkowskeje narodneje wubranki a UEFA pak staj so zwonka hrajnišćow přiwšěm wo diskusije postarałoj. Za wosmifinalnu hru Sewjeroirska–Wales je europski koparski zwjazk sudnika Martina Atkinsona nominował. Jendźelčan ma nadawk, jutře mały „wul­kobritaniski bój“ nawjedować. Problemy z dorozumjenjom wón zawěsće žane njezměje. Do toho bě w němskej za­zběhowej hrě přećiwo Ukrainje a partiju Portugalskeje přećiwo Madźarskej sudźił. Němski referee Felix Brych budźe jako štwórty oficialny zasadźeny.

Tež turkowske medije staraja so zwonka kopanišćow wo zajimawowsće. Masiwnych pisomnych nadpadow a skřiwdźenjow w socialnych medijach dla je Fatih­ Terim, trenar narodneho mustwa Turkowskeje, 21 ludźi pola statneho rěčnistwa přizjewił. Nimo toho sej wón žada wotstronić komentary na Twitteru a Instagramje, kotrež měrja so přećiwo jeho dźowce Buse a přichodnemu synej Volcanej Bahçekapılıjej.

Sportowalia so zabawjeli

štwórtk, 23. junija 2016 spisane wot:
Pančicy-Kukow (AO/SN). Swój integratiwny towarstwowy a sportowy swjedźeń je minjeny kónc tydźenja Sportowe towarstwo Marijina hwězda přewjedło. Sobotu stejachu lochkoatletiske wubědźowanja w srjedźišću. Byrnjež najlěpšich mytowali, dóstachu na kóncu wšitcy wobdźělnicy medalje a dalše připóznaća. Wo bjezporočny wotběh postara so sobu 25 přichodnych kubłarkow Serbskeje fachoweje šule za socialnu pedagogiku Budyšin. Nowosć bě, zo su wječorny sportowy bal w klóšterskej bróžni přewjedli, hdźež hraješe kapała Fünf an der Feier. Njedźelu je sportowe towarstwo na klóšterskim swjedźenju z pomocu kompjutera sněhakowanske skakanje přewjedło.

Serbske koparki sej pjate městno zawěsćili

štwórtk, 23. junija 2016 spisane wot:

Mühlwald/Sankt Martin in Thurn (SN/JaW). Serbska koparska wubranka žonow je sej dźensa na 3. europeadźe, koparskich mišterstwach awtochtonych narodnych mjeńšin Europy, w Južnym Tirolu 5. městno wubědźiła. Před znowa wulkotnej fanowej kulisu porazychu łužiske koparki mustwo Retoromankow z 1:0 a zawěsćichu sej tak dobyće­ poslednjeje hry. W samsnym času wubědźowachu so w połfinalnych hrach Okcitančanki přećiwo Ladinjankam a Němki z Ruskeje přećiwo Němkam z Južneho Tirola wo zaćah do finala. Prěnja hra skónči so 4:0, tamna 0:1. Okcitančanki nastupja tuž přećiwo Němkam z Južneho Tirola wo dobyće pola žonow.

Dźens wječor wotměja so štwórćfinalne partije muži, kotrež běchu zamoł­wići wčera w Sankt Martinje in Thurn wulosowali.

Lyon. Duel mjez Portugalskej a Madźarskej běše najkuriozniša hra europskich koparskich mišterstwow 2016. Hižo w 9. min. Madźarojo 1:0 nawjedowachu, štož poradźi so Gerje. Ale hišće do połčasa (42.) dósta Nani dobru přihrawku Ronalda a wuruna. Po přestawce zahaji so prawy spektakl. Wólny kop madźarskeho kapitana Dzsudzsáka w 47. min. bu wot portugalskeje murje k 2:1 wotfalšowany. Tři mjeńšiny po tym poradźichu so portugalskemu superstarej najkrasniše wrota předkoła. Ronaldo kopny bul z pjatu do dołheho kuta k 2:2. Dalše pjeć mjeńšin pozdźišo trjechi Dzsudzsák 3:2 za Madźarow. Znowa bě třělwa hinaši směr dóstała a bě nje­dźeržomna. Njetraješe dołho a Ronaldo po dobrej flance Quaresmana z hłowu ke kónčnemu 3:3 (62.) přetwori.

Poslednju hru nětko dobyli

štwórtk, 23. junija 2016 spisane wot:

Serbska koparska wubranka žonow – Wubranka Retoromankow 1:0 (1:0)

Zestawa SKWž: Jadwiga Richterowa – Janika Bětnarjec, Franciska Hellnerowa, Jana Mejglowa, Michaela Domaškec, Lenka Fryčec, Sophia Bejmakec, Anna Richterec, Marie-Luise Pjetašec, Chrystina Pašcyna (45. Lara Brücknerec), Helena Bětnarjec (27. Klawdija Hejdušcyna, 58. Lubina Mičkec)

Přećiwo mustwu Retoromankow, kotrež běchu runohódny přećiwnik, je Serbska koparska wubranka žonow hižo zahe wšo rozsudźace wrota docpěła. W 4. min. kopny Retoromanka Chrystinje Pašcynej w šěsnatce do nohow, a sudnik pokaza na dypk. Sophia Bejmakec pokutny kop wěsće do kuta přetwori.

Wuslědki (23.06.16)

štwórtk, 23. junija 2016 spisane wot:

Tabulki po hrach předkoła koparskeje europeady – mužojo

skupina A

1. Ladinojo   3  9  13:1

2. Madźarojo z Rumunskeje 3  6  10:3

3. Adalet  3  3  4:14

4. Wubr. z Pustertala*  3  0  0:9

* Wubranka z Pustertala zastupuje Zapadothrakiskich Turkow, kotřiž so na turněrje wobdźělić njemóža. Wuslědki wubranki so njehódnoća.

Skupina B

1. Karačajenjo  3  9  20:2

2. Retoromanojo  3   6  9:7

3. Romojo z Madźarskeje 3  3  6:8

4. Wubr. mjeńšin z Estiskeje  3  0  0:18

Skupina C

1. Madźarojo ze Słowakskeje  3  7  13:2

2. Korutanscy Słowjency  3  6  15:3

3. Łužiscy Serbja  3   4  9:6

4. Němcy z Danskeje  3  0  1:27

Skupina D

1. Okcitanojo  3  7  9:3

2. Słowacy z Madźarskeje  3  6  12:7

3. Danojo z Němskeje  3  4  9:4

4. Aromunojo   3  0  2:18

Skupina E

1. Němcy z Južneho Tirola  3  9  14:3

2. Sewjerni Frizojo 3  4  10:15

3. Manksojo  3  3  4:6

4. Němcy z Pólskeje  3  1  6:10

Skupina F

1. Němcy z Ruskeje  3   7  17:1

2.  Južni Serbja z Chorwatskeje 3  5  10:2

3. Němcy z Madźarskeje  3  2  4:13

4. Cymbrojo z Italskeje  3  1  3:18

Žony:

Skupina G

1. Okcitančanki 2   6  14:2

2. Němki z Južneho Tirola 2  3  6:2

3. Łužiske Serbowki  2  0  1:17

Skupina F

1. Němki z Ruskeje   2  6  10:0

2. Ladinjanki  2  3  2:2

3. Retoromanki   2  0  1:11

Štwórćfinalne partije muži dźensa, 23. junija, we 18 hodź.:

Karačajenjo – Ladinojo

Okcitanojo – Madźarojo ze Słowakskeje

Němcy z Južneho Tirola

– Madźarojo z Rumunskeje

Němcy z Ruskeje

Sand in Taufers (SN/JaW). Dobyćerja 3. koparskich mišterstwow narodnych mjeńšin Europy w Južnym Tirolu wuhraja bjez wobdźělenja Serbskeje koparskeje wubranki. Wona njezamó wčera dwubój z Korutanskimi Słowjencami za sebje rozsudźić a je z poražku 3:2 štwórćfinale misnyła. „Smy sej wjac předewzali, ale to je kopańca. Wězo so mjerzam, wšako mějachmy šansu dale­ přińć“, wobžarowaše kapitan Pětr Domaška. Kaž nawodnistwo turněra informowaše, nastupja serbscy koparjo zajutřišim, pjatk, w hrě wo 13. městno přećiwo Sewjernym Frizam w Ahrntalu. Serbske koparki hraja hižo jutře w Mühlwaldźe wo 5. městno.

Serbska koparska wubranka pak wčera přiwšěm pokaza, zo je dobry přěhračk. Koparske towarstwo Ahrntal přeprosy po hrě na zabawny wječor. Mjez hosćimi běchu tam nimo serbskeho tež mustwo Němcow z Danskeje a mnozy serbscy přiwisnicy. W duchu europeady pěstowachu wšitcy lóštnu zhromadnosć. Wo dobru naladu staraštaj so live-skupina a akordeonist­ Florian Bejmak, kiž skupinu sčasami zesylni. Tak zaklinčachu k zabawje tež serbske štučki.

Paris. Němska wubranka pod trenarjom Joachimom Lö­wom je jako dobyćer skupiny C wosmifinale europskich koparskich mišterstwow 2016 docpěła. W Pariskim Prinzenparku su Němcy wčera wječor, w samsnym času, jako hraješe Serbska koparska wubranka w Sandźe in Taufers přećiwo Korutanskim Słowjencam, Sewjernu Irsku z 1:0 přewinyli. Jeničke wrota docpě Mario Gomez­ w 30. min., po tym zo bě Thomas Müller jeho z finalnej přihrawku posłužił. Nimo Gomeza bě wčera wot wšeho spočatka tež młody hrajer Josua Kimmich zasadźeny. A bě nimale na kóždej druhej wulkošansy wobdźěleny. Jich bě cyłkownje sydomnaće. Hižo zahe su němscy koparjo na přećiwnika wulki ćišć wukonjeli. W 7. min. na přikład dósta Müller přihrawku Mesuta Özila, ale sewjeroirski wrotar Mc Govern jeho třělwu wotwo­bara. Njezbožo měješe Müller po flance Kimmicha. Nadběhowar FC Bayern Mnichowa ćisny so do třělwy a zhłójčkowa bul do žerdźe (23.). Wažne bě, zo ma Löw ze­ sylnym youngsterom Kimmichom a z Gomezom hrajerjow, kotrajž budźetaj we wosmifinalnej partiji za­wěsće zaso wot spočatka zastupjenaj.

nowostki LND