ST Motor Kumwałd –

ST Marijina hwězda 0:6 (0:3)

Zestawa hosći: D. Matik – Luk. Hoge, T. Jurš, K. Pakoßnick, R. Cyž, J. Ladewig (67. E. Bulank), Fl. Bulank, J. Kuring, Ch. Cyž, J. Pakoßnick (65. Pa. Lugge), A. Eldor (46. F. Kreuz, 74. E. Zynda)

Klóšterscy koparjo zahajichu hru na kumštnym trawniku w Kumwałdźe z wysokim tempom. W 3. min. ležeše kulowata koža hižo we wrotach hosćićela. Po kombinaciji Christofa Cyža z Alijom Eldorom třěli rutinjej Jakub Pakoßnick 1:0. Traješe hač do 26. min., doniž Ronald Cyž z 25 metrow direktnje k 2:0 njetrjechi. Nětko so tež hosćićeljo raz strašnje w šěsnatce hosći zjewichu. Po běhu Sebastiana Mietha z praweho boka a třělwje na krótku žerdź zamó David Matik wrota čiste dźeržeć. Z direktnje přetworjenym róžkom Eldor kurioznje na 3:0 zwyši. Ch. Cyž a J. Pakoßnick mjenujcy napřećiwneho wrotarja wuspěšnje myleštaj (37.). Z třělwu Ch. Cyža snadnje nimo wrotow so prěnja hrajna połojca zakónči (44.).