Budyšin (SN/bn). Kupjele Hornjeje Łužicy hódnoća dotalnu kupansku sezony dosć rozdźělnje. Njehladajo zdźěla wobmjezowane wopytowanske kapacity a winowatosću dodźeržeć hygienowe předpisy je naprašowanje a nawal ludźi tu wulki a tam snadny. Wosebite prózdninske poskitki za dźěći, nawuknyć płuwać, su pak chětro požadane.
„Měnjate wjedro je wuskutkowało, zo so ludźo tak prawje k nam njezwaža. Tuchwilu bychmy wšědnje něhdźe 500 ludźi wjace witać móhli, hač přińdu. Zajimcy maja tuž dobre wuhlady, pola nas tež krótkodobnje městno dóstać. Prózdninske poskitki pak su hižo wot meje wuknihowane“, rozłoži płuwanski mišter Kulowskeje lěsneje kupjele Uwe Mickel.
Podobna je situacija we Wołbramecach (Steinigtwolmsdorf) a Kumwałdźe (Cunewalde). Hinak je połoženje w Budyskej Sprjewinej kupjeli, hdźež prawidłownje aktualnje dowolenych 700 wopytowarjow dospołne wućeženje woznamjenja.
