Winowatosć so šćěpić dać je politiski rozsud
Wojerecy/Kamjenc (SN/MiR). Přistajeni klinikow a hladarnjow maja wot 16. měrca dźěłodawarjej dopokazać, zo su přećiwo koronje šćěpjeni. Hižo nětko pokazuje wšitko na to, zo njezamóža wšitcy sobudźěłaćerjo wotpowědnych předewzaćow šćěpjenje dopokazać, a mnozy so tež dale šćěpić nochcedźa. Mjeztym zwjazkowe strowotniske ministerstwo na to skedźbnja, zo njehodźi so parcielna šćěpjenska winowatosć konsekwentnje přesadźić. Wone ma za to, zo móhli w jednotliwych padach nješćěpjeni tež po 15. měrcu na swojim dźěłowym městnje dale skutkować. Doskónčnu zamołwitosć, wo tym rozsudźić, štó smě nješćěpjeny dale dźěłać a štó nic, ma na kóncu wotpowědny strowotniski zarjad. To wobkruća tež Andrea Špitankowa, nawodnica hladarnje swj. Moniki w Kamjencu. „Njemóžu k tomu ničo rjec, dokelž strowotniski zarjad rozsudźi. My pak trjebamy kóždeho jednotliwca.“
