Wjacore iniciatiwy z Łužicy ludźom w nuzy pomhaja
Smjerdźaca/Čorny Chołmc/Rakecy (SN/MiR). Wulka je pomoc ćěkancam z Ukrainy. W nowych medijach ludźo po cyłej Němskej informuja, zo maja swobodne bydlenje za ćěkancow. Mjeztym su, prěnjorjadnje na priwatnu iniciatiwu, w Budyskim wokrjesu prěni pomoc pytacy dóšli. Tak přebywataj w Smjerdźacej staršej z pjeć dźěćimi w bydlenskim domje Handrikec swójby. „Cyle spontanje smy z mandźelskim Stefanom a bratrom Měrkom rozsudźili, zo móhli direktnu podpěru poskićić“, powěda Alenka Šmitowa. Danko Handrik, přebywacy w Słowakskej, bě na mjezy k Ukrainje zašłu srjedu dwě swójbje narěčał. Mjeztym su so nan a mać z pjeć dźěćimi w starobje dźewjeć do 16 lět w Smjerdźacej w Handrikec separatnym bydlenju zadomili.
W gmejnje Dobruša/Huska přebywa hižo druhi tydźeń 16lětna młodostna w kruhu spřećeleneje swójby. Z wuchodneje Ukrainy pochadźaca je w Kijewje wuměłsku šulu wopytała. Wróćo wostajić dyrbješe wona swojich swójbnych.