Ličba schorjenych na boreliozy w našich kónčinach spochi stupa

Drježdźany/Radwor (SN/MiP). Něchtóžkuli z nas je sej njepřijomneho parazita w minjenych měsacach w swojej zahrodźe hižo raz zapopadnył: klěšća. Tež kóčki a psy sej jeho dundajo po łuce druhdy w swojim kožuchu sobu domoj přinjesu. Hižo při temperaturach wot 7 stopjenjow je přerěznje tři milimetry wulki, krej cycacy roztoč­ (Milbe) aktiwny. Změny klimy dla wón za čas zymy hižo njewotemrěje – něhdźe tři do pjeć lět je w našich kónčinach žiwy, tak informuje Přirodoškitny zwjazk Němskeje (NABU) na swojej internetnej stronje.

Za čłowjeka a zwěrjata je njepřijomne, zo přenjese klěšć dwě infekciskej chorosći: bakterijowe schorjenje boreliozy a wirusowe schorjenje FSME – meningoencefalitis zažneho lěća. Po cyłej Němskej rozšěrjena je wosebje prěnja mjenowana chorosć. Něhdźe kóždy trěći klěšć ma borelije we sebi.