Budyski wokrjesny sejmik so jasnje za přichod chorownje wuprajił

Budyšin (SN/MiR). Budyscy wokrjesni radźićeljo kaž tež krajny rada Udo Witschas (CDU) běchu sej wčera přezjedni: Staciji za gynekologiju a pomoc k porodej w Kamjenskej chorowni swj. Jana matej so ­zachować. Na wurjadnym posedźenju wokrjesneho sejmika je 62 přitomnych radźićelow a krajny rada po pjeć hodźiny trajacym wuradźowanju próstwje Witschasa a wjacorych radźićelow přihłosowało. Dwaj radźićelej běštaj posedźenje dočasnje wopušćiłoj. 23 radźićelow so na zeńdźenju wobdźěliło njeje. Wobsah próstwy wopřijima zawěsćenje strowotniskeho zastaranja při porodnej pomocy. Mjez druhim ma so wusadźeć zawrjenje hač k rozsudej sakskeho ministerstwa za socialne a towaršnostnu zhromadnosć nastupajo změnu nadawka zastaranja Kamjenskeje chorownje. Zdobom ma krajny rada z wotpowědnymi zarjadnišćemi rěčeć, to rěka nimo z chorownju a ministerstwom tež ze sakskej krajnej direkciju.