W Domje swjateho Jana w Smječkecach na wosebitu potrjebu reaguja

Smječkecy (SN/StŠ). Hordźe a přiwšěm měrnje a wěcownje pokazuje mi nawoda Domu swjateho Jana w Smječkecach, Richard Paška, nowe bydlenje, kiž su před krótkim na tamnišim arealu oficialnje do słužby wzali. Na prěni pohlad je to bydlenje kaž kóžde druhe. A tola ma někotre wosebitosće, nawoda domu rozkładuje: „Bydlenska jednotka je w přizemju a wopřijima nimo bydlenskeje spansku, kupjel a kuchnju a separatny rum za přebywanje našich sobudźěłaćerjow, móhłrjec běrow.“ To je trjeba, dokelž je čłowjek, kotryž w nowych rumnosćach bydli, 24 hodźinow dźeń wote dnja hladanja potrěbny.