Budyšin. Serbska centralna biblioteka a Serbski kulturny archiw wobdźělitej so na lětušim dnju archiwow. Tón budźe njedźelu, 6. měrca, wot 14 do 17 hodź. Mjez druhim chcedźa internetne projekty, na přikład digitalizowane zawostajenstwo Bogumiła Šwjele pod hesłom „Z magacina do syće a do swěta“ předstajić. Dale poskića wodźenje „Archiw jako kulturny pomjatk“. Jako wosebitosć pokazaja film „Pjeć wobrazow (nje)wšědneho dźiwadła“ wo serbskim dźiwadle, dźiwadźelnikach a přihladowarjach z lěta 1976 pod režiju Olafa Rosenberga.
Pokazaja jejka ze wšeho swěta
Slepo. Jutrownu wosebitu wustajeńcu „Jeja swěta – Swět jejow“ wotewru jutře, pjatk, w 15 hodź. w Slepjanskim Serbskim kulturnym centrumje. Zestajił je ju bywši konserwator Lipšćanskeho Grassi-muzeja Erhard Schwerin. Přehladka dawa dohlad do swěta debjenych jejkow kołowokoło globusa. Tak pokazaja něhdźe 800 jejow z 45 krajow, kotrež su regionalnje a tematisce rjadowane. Wosebje słowjanske ludy wuchodneje, srjedźneje a juhowuchodneje Europy su jara mnohostronske wuměłske debjenje wuwili. Wustajeńca budźe hač do 1. meje přistupna.