Chrósćicy. Monika Gerdesowa přeprošuje wšitkich zajimcow na poslednje zarjadowanje lětušeje kulturneje zymy do Chróšćan putniskeje hospody. Sobotu, 7. februara, přednošuje tu farar Uwe Peukert z Kamjenca wo temje „Kak bu kriza z nowym spočatkom abo: Kak móže ćežke schorjenje tež hojić“. Wón spyta připosłucharjam na zakładźe swójskich nazhonjenjow impulsy dać, kak móhli hłubokosć a změny w swójskim žiwjenju docpěć. Při tym praša so, hač je to tež bjeze ćežkeho wosobinskeho nazhonjenja – na přikład schorjenja – móžne. Přednošk započina so w 19.45 hodź a je w němskej rěči. Hižo 16 hodź. su dźěći přeprošene – jim chce „ćeta Monika“ bajku bać.

Přizjewjenje nowačkow

Budyšin. Štóž chce swoje dźěćo do 5., 6., 7. abo 10. lětnika na Budyskim Serbskim gymnaziju přizjewić, móže to wot štwórtka, 19., do pjatka, 27. februara. Šulski běrow je w slědowacych časach wotewrjeny:

štwórtk, 19. februara, 8.00 do 14.00 hodź.; pjatk, 20. februara, 8.00 do 12.00 hodź.; póndźelu, 23. februara, 8.00 do 15.30 hodź.; wutoru, 24. februara, 8.00 do 18.00 hodź.; srjedu, 25. februara, 8.00 do 15.30 hodź.; štwórtk, 26. februara, 8.00 do 15.30 hodź.; pjatk, 27. februara, 8.00 do 12.00 hodź.