„Bjer sej Kurfürstec Róžu za přikład“, poruči mi w młodych lětach mój dźěd, něhdyši Radworski šulski nawoda Jan Andricki. Što bě jeho k tomu pohnuło?
Do serbskeje pjekarskeje swójby z třomi dźěćimi narodźena běše wona hižo jako šulerka tamnišeje šule njewšědnje zwědawa. Wučer Pawoł Delan podawaše jej tuž priwatnje stenografiju, při čimž jeje spěšnosć w krótkopisu powšitkownje wobdźiwachu. Wona pak njesta so stenotypistka, ale wukubła so w Radworju na pěstowarku. Přichodna etapa jeje studijow bě wučerstwo delnjeho schodźenka w Małym Wjelkowje. Slědowaše uniwersitny studij pedagogiki z kwalifikaciju za wyši schodźenk w předmjetomaj biologija a hudźba w Halle a Berlinje. Jeje dalši zaměr běštej diplom pedagogiki a psychologije na Humboldtowej uniwersiće w Berlinje a naslědna promocija. Jako w praksy nazhonita wučerka chcyše sama tohorunja pedagogow wukubłać. Tola to jej jako njestronjance a přeswědčenej křesćance zapowědźichu.