Budyšin (juny/SN) Ze zhromadnej de­klaraciju pod titulom „Govorimo istim jezikom!“ (Rěčimy samsnu rěč) je so ně­hdźe 200 awtorow z krajow něhdyšeje Juhosłowjanskeje k tomu wuznało, zo je jich rěč, kotruž w Bosniskej, Chorwatskej, Čornej Horje a Serbiskej nałožuja, jednotna rěč z regionalnymi wariantami. Wo status něhdyšeje serbiskochorwat­šćiny so wot rozpada Juhosłowjanskeje w 1990tych lětach wadźa. Wšě nowe staty běchu „swoju“ rěč pod nacionalnym mjenom zesamostatnili a zdźěla tež z wotpohladom přetworili, zo bychu rozdźěle k susodnym rěčam powjetšili. Deklaracija je nětko krok do nawopačneho směra, wróćo k jednotnemu rěčnemu rumej na zapadnym Balkanje.

We wšědnym žiwjenju so ludźo w štyrjoch mjenowanych krajach bjez problemow rozumja. Wšako maja wšitke štyri rěče samsny zakład. Oficialnje pak płaćitej w Chorwatskej chorwatšćina a w Serbiskej serbišćina jako hamtskej rěči. Bosniska-Hercegowina­ ma oficialnje samo tři hamtske rěče – nimo mjenowaneju tež bosnišćinu. To wjedźe hdys a hdys k absurdnej situaciji, zo so samsny tekst trójce jewi, dokelž je tak předpisane.