Wolejbulowy turněr a wobswětowe kubłanje z wida mnohotnosće

Budyšin (SN/MiR). „Přimaj so gratu! – młodźina.akcija.zabawa“ rěka projekt, kotryž nabywa mjez serbskimi młodostnymi přiběracy zajim. Tež lětsa běchu so skupiny młodostnych wo mytowanski pjenjez prócowali. Wuměnjenje za to, dóstać­ za swójski projekt financy, bě, zaběrać so z temu demokratija a mnohotnosć. Partnerstwo za demokratiju přewostaja na lěto serbskemu młodźinskemu dźěłu tysac eurow. Swobodny stat Sak­ska a program zwjazkoweho ministerstwa za swójby a młodźinu „Demokratiju praktikować“ iniciatiwu podpěrujetej. Wo rozdźělenju pjenjez je jury sobotu w Budyskim Serbskim domje rozsudźiła.

Zarjadowanje moderěrowała bě kubłanska referentka Domowiny Rejzka Krügerowa. „Smy jara zbožowni, zo su wšelake młodźinske cyłki składnosć wuži­wali, rozestajeć so z prašenjom, kak wšelakorosć kulturow do cyłka zjeć a serbske cyłki skrućić. Do rozsuda, kotry projekt mytuja a kotry nic, pak mějachu so jurorojo zaběrać z idejemi a projektami młodostnych. Žurla Serbskeho domu přeměni so tuž na jewišćo.