Towarstwo přećelow Serbow w Praze wabi ze zajimawymi poskitkami
Praha/Budyšin (SN/MiR). Je Towarstwo přećelow Serbow w Praze (SPL) hišće wažne? To chcyše jeho předsyda Lukáš Novosad zańdźeny pjatk wječor někotrych přitomnych Serbow wědźeć na zarjadowanju k přepodaću Myta Domowiny w Budyskim Serbskim domje. Prašani jemu wotmołwichu, zo sej bjez prašenja dalše skutkowanje SPL přeja. Přiwšěm woni wědźa, zo je dźeń a ćešo zdobyć Serbow, kotřiž bychu direktny zwisk do Prahi pytali. Sylniši wopyt z Łužicy w čěskej stolicy pak by skutkowanje a wuprudźenje SPL sylnił. Toho je sej jeho předsyda wěsty a z nim tež referent Domowiny za kulturu a wukraj Clemens Škoda. „Prócujemy so wo nošne zwiski do słowjanskeho wukraja. Smy jara wjeseli, zo je sej z pomocu Domowiny móhł lětsa Wudworski folklorny ansambl do Słowjenskeje dojěć. Tajke wuprawy njejsu samozrozumliwe, za to wšak su pjenjezy trěbne. A w tym tči husto špak za intensiwnišu wuměnu, tež z našimi partnerami, z kotrymiž lěta dołho zwiski wudźeržujemy, kaž z SPL w Praze.“