Wo sobotnej digitalnej konferency Załožby za serbski lud

Budyšin (SN/at). Proces digitalneho přewróta wobwliwuje dźeń a wjace wobłukow wšědneho žiwjenja. Nastupajo serbsku rěč dotal sej hižo docpěte předstajić a wo přichodnych wužadanjach so do­rozumić bě předmjet digitalneje konferency. Přeprošenje Załožby za serbski lud sćěhowaše sobotu něhdźe 40 zajimcow do Budyskeho hotela Residence.

Ze spočatkow jednotliwcow-horliwcow w 1990tych lětach, na přikład z „Lausitz“-pismami, wuwi so zaměrne skutkowanje na wšelakich polach. Serbskej rěči a wotpowědne tastaturowe ćěrjaki su dźensa mjezynarodny standard, kaž załožbowy direktor Jan Budar zawodnje potwjerdźi. Wuchadźišćo za to bě zapisanje do datoweje banki Unicode CLDR. To njeje wotzamknjeny proces, dyrbiš so wo wobstajnu aktualizaciju starać, kaž Wito Bejmak ze Serbskeho instituta podšmórny. Wšako so koncerny kaž Apple, Microsoft, Google abo IBM na mjenowane daty złožuja. Njejsu-li aktualne, móže so stać, zo wone rěč hižo tak njewobkedźbuja.